المنتدى للفائدة و ليس للمجاملة

35 61

لايمكنك التصويت حتى الحصول على 20 نقطة على الأقل
إضغط هنا للإخفاء

ابراهيم 78 -140
قبل 6 سنه و 9 شهر

السلام عليكم ورحمة الله و بركاته

أولا الموضوع ممكن يكون طويل و ممل عند البعض

ولا فيه فايدة معينه يعني لا تجي تنتقد انه موضوع بدون فايده للسيارات

بتكلم بشكل عام عن بعض الاعضاء بالمنتدى و خارج المنتدى

و قد يكون على شقين او اكثر

المنتدى هذا او غيره ليش موجود ؟؟؟

موجود للفائدة و اللي عنده فائدة يطرحها و اللي عنده استفسار نجاوب عليه

لكن البعض ينزل استفسار و يكون غلطان و نقوله غلطان ماهو عاجبه

كأني انا حاط القانون أو النظام هذا من عندي يا اخي خالفت النظام بشيء معين

قلنا لك غلطان و اكثر من عضو قالك غلطان خلاص انتهى الموضوع

ما يحتاج نجاملك و نطبطب على كتفك كأنك طفل

يجيك واحد مثل العضو calvin.a7


قبل يومين منزل موضوع صاده ساهر بشارع سرعته 100 وهو يمشي 120 ولا هو عاجبه بعد

يعني وش تبينا نقولك لا روح قدم اعتراض

غلطان خلاص انتهى الموضوع لو انك ماشي اقل من 100 او تغيرت سرعة الشارع للأقل

و صادك نقول لك حق تستفسر او تقدم اعتراض لكن غلطك واضح خلاص

غيره يجي واقف بمكان غلط و تنزل له مخالفة وقوف غلط او أماكن غير مخصصه للوقوف

يجي يشاورنا وش تشاور خلاص مخالفة نزلت و انت غلطان و انتهى الموضوع

تجي تبربر عندنا ولو قلنا لك غلطان تزعل

عندك شيء روح المرور و قدم اعتراض و خلهم يقنعونك انك غلطان اذا ما عجبك كلامنا

بتكلم بشكل عام و بشكل خاص عن العضو calvin.a7

المشكله ردودي بموضوعه جاتني ديسلايكات كثير مهما كان اسلوبي

عليك بمختصر الاجابه كلامي صح او غلط و خلاص

بعد كلامي له كله و اوضح له انه غلطان

راح يراجع عضويتي و لقى الكابرس و جاي و كأنه يستنقص منيو يستهزأ

يقول روح عدل الكابرس و كلام فاضي

و يقول انه موظف له سنتين و مدير قسم و من عرق جبينه و سيارته ما يقل سعرها عن 200 ألف

هياط فاضي من ابو ريالين

بس بعرف ورع توك موظف لك سنتين فقط و معاك سيارة قيمتها فوق 200 الف تقول من حر مالك

و مدير قسم كم راتبك وزير انت او من أعضاء الشورى راتبك يصك فوق 50 ألف

عشان خلال سنتين تشتري سيارة بحر مالك

لو فرضنا راتبك 15 ألف بما انك توك متخرج و متوظف من سنتين فقط لا خبرات سابقه ولا شيء

والله لو ساكن لحالك بعيد عن أهلك و تدفع ايجار و مصاريف نفسك اكل و شرب و غسيل ملابس

و مصاريفك كلها مستقله انك ما تقدر تشتري سيارة قيمتها 200 ألف خلال سنتين

اللي راتبه 5000 ريال و ساكن بعيد عن اهله حتى لو كان عزوبي و ما احد يساعده بالمصاريف

حتى لو بشكل غير مباشر يعني اكلك و شربك و كل شيء انت تدفعه ما تقدر توفر 500 ريال بالشهر

و انك تطفر قبل الراتب بأسبوع وراك ايجار و مصاريف

ولو راتبك 15 ألف بتكثر مصاريفك ولا بتسكن بغرفة و حمام تكرمون

راح تتوسع شوي اقلها تاخذ غرفة و صالة و مطبخ و دورة مياه

و ايجارها ما بيقل عن 1500 ريال بالشهر

ووراك مصاريف نفسك ما بتقدر توفر 10 الاف من الراتب شهريا

يعني الكذب الرخيص هذا فكنا منه و اترك الهياط عنك هذا اذا قلنا راتبك 15 الف

ما كان 6 او 7 الاف و يمكن اقل

و يجيك يقول من حر مالي وين حر مالك

اللي ساكن مع اهله و ملابسه مغسوله جاهزة و اكله و شربه بالبيت و ساكن بلاش

و ما يصرف الا طلعاته الخاصه مع اخوياه او غيرها هنا تقدر توفر حتى لو راتبك قليل

من ناحية ثانيه فرضنا كلامه صحيح كله

الله منعم عليك و تجيك مخالفة و اول مشاركة لك بالمنتدى دمعتك بطرف عينك وهي كلها 300 ريال

ولا تدري وش تسوي اجل لو قاطع اشاره و جاتك 3000 ريال وش تسوي

لو طلعت و لقيت سيارتك ام 200 الف مصدومه او ما نقول مصدومه لو لقيت احد لاعب بالبويه

او المرايه مكسورة فقط بتروح تتعالج عند طبيب نفسي او وش تسوي ؟؟

المفروض شيء مثل كذا ما تشيل همه

و المفروض يكون موضوعك كتحذير للأعضاء و ليس تتشكى من المخالفة جاتك

يعني يا شباب انتبهوا ترى فيه ساهر بالمكان الفلاني يصيد على السرعه الفلانيه

ولا يكون بالطريقه اللي انت ذكرتها

و تراجع مواضيع اللي ينتقدك و تجي تتمسخر عليه مبسوط بنفسك مدير قسم

و مثل ما دخلت عضويتي تشوف وش نوع سيارتي

دخلت عضويتك بعدها و رحت موقع حراج اشوف وش انت من لحيه

لقيتك تسوم ساعات تقليد الاصلي و مستعمله حتى ليتها جديده و تسوم بـ10 ريال

يعني مدير قسم و مبسوط بنفسك و مشتري سيارة من حر مالك بأكثر من 200 ألف

و تلبس ساعه مقلده و مستعمله حتى ؟؟؟

المهم لف جبهتك بشاشه و طهر مكان التفجير بعدين تعال رد

ننتقل للعضو الثاني الناصح للدين و المصليات سند 10

يعني غير ان المنتدى مخصص للسيارات فقط يجيك بموضوع مخالف

و هو اعلان بإسم الدين

اللي يبي الخير و يعلمنا عن المصليات المتنقله يذكر هالشيء مره وحده و خلاص

لكن تذكره و بعد فترة نفس الموضوع تكرره و عارف كل شيء و تقول الارقام موجوده

و تدري وش الممنوع و اللي تخالفه البلديه ووش اللي ماهو ممنوع

هنا أصبح الموضوع دعاية لك شخصيا او احد اقاربك او تشتغل معهم

ما هو نصيحه و تدور الاجر

فرق بين النصيحه و من يدور الاجر و بين انك تسوي دعاية بطريقة اخرى
______________________________________________

الان بتكلم عن الاوضاع الماديه و الوظيفيه بشكل عام

و هالشيء شفته من الناس بحياتي سواء من اقارب او معارف او عامة الناس بالشارع

مستوى المعيشة اولا

تحصل غالبا اللي طالع من عائلة مستوى المعيشة فيها بسيط

و طول عمره اهله ساكنين ببيت ايجار تحصله يخلص الثانوي و يبحث عن وظيفه

يساعد اهله فيها و يصرف على نفسه و الوظيفه غالبا تكون راتبها ما يتجاوز 4000 ريال

و غالبا حتى ما يكمل جامعه و ان كمل جامعه تحصل اهله وضعهم المادي متيسر اكثر

اقلها يقدرون يشترون له لو سيارة مستعمله يداوم فيها بالجامعه حتى يتخرج

و يتوظف بمكان افضل شوي

ولا قد مر علي احد اهله وضعهم المادي سيء و بدأ من الصفر فعلا

و كون نفسه و شرى سيارة لنفسه من فلوسه ماهو قرض و يقسط

او انه توظف حتى بمكان حلو و راتب عالي او حتى دخل مثلا كلية عسكرية و تخرج ضابط

لابد وضع العائلة المادي يكون ممتاز و عندك واسطات لتكمل حياتك بشكل ممتاز

و من الناس ساكن مع اهله لكن ببيت ملك خلص ثانوي و جامعه و توظف

و اعتمد على نفسه و و اشترى سيارة كاش او ايجار منتهي بالتمليك المهم من فلوسه

هنا يكون نصف معتمد على نفسه لانه حتى بعد الوظيفه لازال ساكن بلاش و امورة متيسره

لا دفع ايجار ولا تمرمط ولا شيء

و من الناس وهو باقي يدرس بالجامعه و عمره ما تجاوز 20 سنه و معاه سيارة فخمه و غاليه

يخلص جامعه وظيفته جاهزة يعني لا تعب و شقى مثل غيره ولا شيء

نجي لمثلا اللي ساكنين بأحياء راقية بمختلف مدن المملكه و ساكن بفيلا ماهو شقه

غالبا ما توقف دراسته عند الثانويه

تحصله يكمل جامعه و معاهد و شهادات و خبرات ما شال هم الوظيفه و المصاريف لاحق عليها

بابا و ماما يوفرون له كل شيء و اتحدا الاشكال هذي تحصله يخلص ثانوي ويتوظف براتب 3 او 4 او 5 الاف

يخلص دراسه و عنده الوظيفه جاهزة بعد الواسطات

بعكس اللي حياته ملحطه من البدايه حتى ان دخل جامعه و دف نفسه بالقوة تخرج و جلس بالبيت

او توظف براتب ضعيف

شايفين مهندسين و جامعيين بدون وظائف او يتوظف وظيفه ما استفاد من شهادته

مثله مثل حق الثانوي

لا تقول السبب ما اجتهد و ما دور

جيب لي واحد ملحط من بداية حياته هو و اهله و خلص ثانوي و حصل له بعثه خارج المملكه

حتى التقديم على البعثات بالواسطه

و راعي الواسطه اهله شبعانين هنا و يحصل واسطه ابتعاث و يجيك نافخ مكوته

و يقولك معاه شهادة من الجامعه الفلانيه و معاه الشهادة الفلانيه ولا يعجبه شيء بعد

و كأنه شقيان بعمره مثل باقي الناس

اللي اعرفه واحد حالته الماديه متوسطه تجيه مخالفة او خراب بسيارته او شيء يشيل همها

اما واحد متيسرة اموره جاته مخالفة او خراب او احد دق سيارته شيء ما يسوى

يمشي و يسامح ما يحسب لها حساب

لكن اللي اشوفه العكس البعض امورة متيسره و تحصله احد دقه بشيء ما يستاهل

وقف الخط كله حتى لو كان الخط زحمه و بالظهر تشوفه عادي عنده واقف بالشمس

و الناس كلها زحمه ما فكر بظروف الناس كلها اللي بالطريق

ولو تقوله يا اخي حرك وقفت الخط شوف لك مكان وقف فيه

طالما السيارة سليمه كلها الاثر بالصدام فقط ووقف طالب بحقك لا تتنازل بسلامتك من حقك

لكن لا تعطل الشارع كله لو نصف ساعه شوف الخط وراه يوقف اكثر من 3 كيلو

كم سيارة عطلت كم عائلة عطلت كم واحد تأخر عن دوامه عشانك و كم واحد تأخر على عياله

طالع يجيبهم من المدارس عشان صدامك ابلشت خلق الله

وانت تقدر تتنازل من البدايه ما لها داعي الوقفه البايخه هذي

يا اخي لا تتنازل لكن شوف لك مكان بالخدمه ووقف و طالب بحقك

اذكر قبل حوالي 3 سنوات بطريق الحرمين كان فيه تحويله

و ماشي قدامي النترا كانت موديل السنه جديده و نمشي ممكن بسرعه 80

دخل علينا واحد من اليمين و سقط على راعي الالنترا و مسك فرامل قوية

ما قدرت اتصرف المسافة بسيطه و مسكة فرامل قوية مسكت فرامل و صدمته

صدمه والله قوية تعتبر الصدام انعدم و حتى جسر الصدام الشنطه انفتحت ولا عاد تتقفل

و الشنطه تأثرت بشكل واضح

نزلنا وقف والله اقل من دقيقه انا من شفته نزل عمره اقل من 25 سنه

قلت والله ابتلشت فيه بينشب لي و انا طفران و اكيد حسب التقييم بتكلف واجد

يعني ما بيرضى بمبلغ بسيط اعطيه او مبلغ الاصلاح و خلاص

عكس الرجل لو كان كبير بالعمر يقدر اكثر ولو ان بعضهم شايب و ينشب لك

لكن اتكلم بشكل عام

المهم نزل اقل من دقيقه سلمنا على بعض معك تأمين قلت لا تأمين ولا رخصة

قال الله يسهل امورك و ركب سيارته و مشى

كل ما تذكرته الى اليوم ادعي له ان الله ييسر اموره و يرزقه

المهم بيطلع النور وانا باقي اسولف

اذا فيه شيء اكتبه بموضوع ثاني اذا باقي لي نقاط

شكلها بتجيني ديسلايكات حتى تنزل تحت الصفر النقاط

في امان الله

إبلاغ

الردود